ordaintzeko autobideen kopurua gurean inon baino gehiago goratu da |
Dagoeneko soberan ezaguna denez, Gipuzkoako Foru
Aldundiak heldu den urteko urrirako martxan jarri nahi du bidesariak kobratzeko
sistema berria. Larraitz Ugarte Gipuzkoako Azpiegitura diputatuak
adierazi zuenez : “errepideen
mantentzea bermatzeko, Bidegiren zorra estaltzen laguntzeko eta garraio
publikoa sustatzeko politikak laguntzeko baliagarri izango da, urtean 38 milioi
euro jasotzea espero da”. Alegia, zure
lanarengatik edo beste edozein arrazoirengatik Gipuzkoaratzeko ohitura baduzu,
are garestiago suertatuko zaizu. Hori
bai. Jakin behar duzu hori ez dela aitzineko sistema kaxkar baten bidez egingo,
ez: “Arkupe sistema bat erabiliko du bidesari berrietan. Ibilgailuek ez dute
gelditu beharko, hesirik gabeko arkupeak izango direlako”. Eskertzekoa bada
behintzat: poltsikoa arinduko dizute bai, baina zu ez zara ezertaz konturatuko.
Eta nola jar daiteke martxan honelako zerga berri bat, hiritarren
matxinada sorrarazi barik? Ba ezin errazago: “Gipuzkoarrei bidesariak ez
kobratzeko sistema prestatzen ari da. Legeak horretara behartuta, ordaindu egin
beharko dute, baina diputazioa pentsatzen ari da gastu hori berdintzeko zer
bestelako neurri har ditzakeen”.
Jakina, horrelako iragarki batek
hautsak harrotu zituen gainontzeko foru aldundietan. Azkeneko adierazpenen
arabera, nola ez, konponbidea kanpoaldetik etorriko da. Gipuzkoa, Bizkaia, Araba eta Nafarroako ordezkariak bilduko dira
uztailaren 7a baino lehen, bidesarietan elkarri beherapenak egitea aztertzeko.
Larraitz Ugartek aurreratu duenez, bidesarietako sistema berria martxan
jartzearekin ez dituzte gipuzkoarrak kaltetu nahi, baina "ezta euskal
herritarrak ere". Ezetz asmatu zeintzuk izango diren kaltetu izan
daitezkeenak..., horretaz hitz egiten omen zuen lehendakariak gure betiko
“abegi ona” aipatu zuenean.
Hau ez da, inola ere, zerbait
berria gurean. TAO aparkatzeko sistema martxan jarri denetik Bilbon, adibidez,
ez da hirian protesta izpirik sumatu. Udal-bulegoan, garabiak kaltetutakoen
artean irratirako inkesta bat egiteko parada izan nuen eta hor aurkitu nuena
negar egiteko modukoa zen: Bilbotik kanpoko garraiolari txikiak, atez-ateko
saltzaileak, hirira bazkaltzera zetozen bikoteak... haserreak eta mehatxuak
udal-langileentzat bakarrik ziren. Interesgarria litzateke jakitea
zenbaterainoko laguntza izan den hori Bilboko (eta sistema hori ezarri zutenen
beste hainbat hiritako) kontuak borobiltzeko orduan.
“Supersur” hegoaldeko saihesbide ospetsuan ere halako zerbait suma
daiteke. Bizkaiko Foru Aldunditik oso azpiegitura arrakastatsua dela esaten
zaigu eta “A-8ko trafikoa erabat jaitsi dela” hura zabaldu zenetik. Baina
deskuidu batengatik barruan aurkitzen bazara –eta ez da gutxitan gertatzen,
horko langile batek azaldu zidanetik– hortik dabilen gidari bakarra zarela
ohartuko zara. Ez da zaila
kanpoaldetik datozenekin zer gertatuko den asmatzea. Bestalde, “Autopista.es”
webgunearen arabera, ordaintzeko autobideen kopurua gure lur maitean inon baino
gehiago goratu da, (2.2 puntu), mota honetako bideetan aurtengo trafikoa erabat
jaitsi den arren: 1995ekoaren parekoa da.
iruzkinik ez:
Argitaratu iruzkina