Itoiz Taldeko lehen formazioa |
“Zure keia eskuetan/ putzara batekin putz / Neregana etorriko da/ eta
berriz izango gara zoriontsu/ edozein herriko jaixetan”.
Herriko jaiekin batera, gurera datoz berriz plaza-taldeak eta gure ohiko
“hit”ak dantzaldiak animatzera eta loaldiak izorratzera egunsenti arte.
Berriki ETB 1en “Ezin dut burutik kendu” izeneko telesaioa ikusteko aukera
izan genuen. Froga modura emititu omen zen saio-pilotua eta euskal musikazaleen
zorionerako oso emaitza onak lortu zituen. Uda osterako atal berriak iragarri
dira.
Orio ekoiztetxeko produkzioan euskal kantagintzan entzunenak izan diren
abestien arrastoa segitzen da. Lehen
atal horretan Sarri Sarri eta Xalbadorren Heriotzean ziren aztergai.
Testigantzen artean, Unai Gurrutxagak gidatutako saioan, Kortatu taldeko
kideenak eta Antton Valverderenak izan genituen. Aipatzeko modukoa Iñaki
Pikabearen kontaketa zehatza beraren eta Joseba Sarrionandiaren ihesaren
inguruan, Sarri Sarri abestiaren oinarria izango zena.
Telesaioan aipatu zirenen kanten artean, nola ez, Lau Teilatu zegoen.
Gaztetako amodio-kanta paregabeak 34 urte bete ditu aurten eta oraindik ez du
bere freskotasun izpi bat ere galdu.
“Badirudi Lau Teilaturen patua beste hainbat herri-kantena izango dela.
Hitzak oso pertsonalak direnez, jendeak, oso ongi zertaz ari den jakin gabe
abestuko du...”. Nahi eta nahi ez, Juan Carlos Perez behin eta berriz bere
sorkaririk preziatuenaz mintzatzera beharturik dago. 2008an, Euskadi Gaztea
irratiko 30. urteurrenean Mikel Erentxunek eta Amaya Monterok beste moldaketa
bat argitaratu zuten, pop kutsu batekin.
Konposaketa honekin errepikatu zen beste horrenbestetan gertatzen den
miraria. Abestirik borobilena, poemarik osatuena, herriaren erabaki
misteriotsuak hurrengo belaunaldietarako uzten duena, abeslaria bere hasierako
pausoak ematen ari denean asmatutakoa da. Gai honen inguruko solasaldi batean,
Erentxunek berak horrela zioen: “Aurreiritzi gutxiago dituzunean ausartago
izaten zara konposatzeko orduan. Gero zuhurrago bihurtzen zara eta funtzionatu
duena errepikatzeko arriskuan eror zaitezke”...
Jose Garate (“Foisis Jauna”) Itoiz taldeko baxuak ere oso azalpen bitxia
ematen zuen: “Lau Teilatu eta Juan Carlosen kanta askotan elizan ikasitako
kultura musikala nabaria da. Abesbatzan erabiltzen diren armonien eragina hor
dago, batzuetan ohartzen ez zaren arren”.
Ukaezina da promozioak eta zenbait multinazionalen kanpainek zerikusi
zuzena dutela hit-zerrendak osatzerakoan baina, egia da baita ere, denbora pasa
ahala bizirik dirauten konposaketak ez direla beti disko gehien saldu
dituztenak.
Belaunez belaun gurekin bizitzera geratzen direnak, nonbait lortu dute
zirrararen giltza barneratzea. Nesum Dorma, La Paloma, Dirty Old Town, Ne me
Quite Pa, Sympathy for the Devil, Eleanor Rigby, Chan Chan, Sunny,
Mediterraneo, Entre dos Aguas, Bizkaia Maite, Smoke on The Water eta beste
hainbat... ez dira guztiak guztion gustukoak izango, baina denak izan dira gai
denboraren iragazkia zeharkatzeko, beste garai bateko gizakiak hunkitzeraino.
iruzkinik ez:
Argitaratu iruzkina