Beth Ditto Barakaldon |
“Emakumeek biluzik egon behar al dute, MET Museora sartu
ahal izateko? Arte modernoko ataletan agertzen diren artisten % 5 baino
gutxiago dira emakumeak, baina irudi biluzien % 85ek erakusten dute
emakumezkoen gorputza”...
Esaldia artelan erraldoi baten barruan dago. Gerrilla
Girls izeneko erakusketa baten barnean dagoen muralean. Horrelako
estatistikak nonahi. Estatistikek behin eta berriz erakusten digute: eskubideen
berdintasuna urrun dago oraindik ere. Eta hori , esan gabe doa, denon arazoa
da.
Bilboko Alondegian erakusketa ikusi ondoren, Barakaldora.
BIME festibala ospatzen ari zen eta azken eguneko egitarauan, azken bolada
honetan biziki maite dudan talde bat zegoen ikusgai: GOSSIP (esamesa) . Hirukote bezala sortua, taldeak duen irudiak gaur
egun erabateko porrota eskuratzeko ezaugarri guztiak ditu. Beth Ditto abeslariak
eta bere taldekideek, beste behin, talentua indarrean diren edertasun ereduen gainetik
pasa daitekeela erakutsi digute. Areago, badirudi ekitaldi bakoitzean horixe
bera ospatzen dutela, dantza egin barik entzun ezin daitezkeen abesti alai eta
lotsagabe horiekin.
Bai, GOSSIP ikusteko asmo sendoa neukan eta horretarako,
horren gustuko ez ditudan zenbait oztoporen gainetik pasa beharko nuen.
Aitortu behar dut. Ase naiz halako jaialdi erraldoiez,
non taldeen zerrendak amaigabeak diren,
non debekatuak dauden ekitaldietan sorpresak eta “bisak”, ordutegiak zehatz-mehatz
bete behar direlako, non kaña bat hartzea abentura bihurtzen den, eta, ororen
gainetik, non segurtasunerako neurriek behin eta berriz gogorarazten diguten
rock jaialdiek ez dutela jada askatasun aldarrikapenarekin zerikusi handirik
izaten. Horretaz guztiaz aparte, betidanik ezinezkoa egin zait egun bakar
batean lau ekitaldi baino gehiago benetan disfrutatzea, gizakien ahalmenetatik kanpo
dagoen zerbait iruditzen zait. Baina ongi mentalizatua nengoen, eta ezin hobe
lagunduta, hara zuzendu nintzen.
Parking erraldoitik, ibilaldi erraldoia txartel-leihatilaraino.
Sarrerak hartuta beste salmahai batera eskumuturrekoak jar ziezazkiguten eta
azkenik barrura. Zerbeza bat eskuetan, Mark Lanegan-en balada akustikoekin
girotu, eta gaueko helburura abiatu ginen.
Ordu eta laurden. Ez minutu bat gehiago ez gutxiago.
Horrelako jaialdien gidoian dagoenez, disgusturik ez gero. Soinuaren kalitatea
gutxitan gozatzen denetarikoa zen eta taldea sasoi onean zegoen benetan. Beth
pozaren pozez txoratzen zegoela zirudien, ahotsa puntu-puntuan zeukala
erakutsiz eta “Eskerikasko” ugari banatuz kantuen artean. Ekitaldi honetan ez zigun
ipurdia erakutsi eta ez zen jendetza artean nahastu, bestetan bezala, baina
tira. Besteak beste kulero txuri-urdin batzuk bota zizkioten eta bitan pentsatu
gabe txapel gisa erabili zituen. Bilboko emanaldirako GOSSIP taldeak bere
bertsiorik neurridunena aukeratu zuen, irudiari dagokionez, baina gaitasun
bakar bat ere aurreztu barik.
Beth oholtza gainean ikuste hutsak feminismoaren
ezinbesteko garaipenaz hitz egiten dit. Zerbaitek bere ausardian, bere narruak
astintzeko eran, bere oihuka kantatzeko moduan gonbidatzen nau harekin
errepikatzera: “Move in the Right Direction!” (Zuzeneko noranzkoan mugi zaitez!). Emakumeek biluzik egon behar al dute rock & roll egiteko? Ba ez.
Beharrik ere ez. Baina Bethek nahi izanez gero, aurrera bolie!
iruzkinik ez:
Argitaratu iruzkina