"Ocho Apellidos Vascos" pelikularen fotograma |
Nire auzoko arrandegian. Adineko andre bat, irriz eta
barrez, aurreko egunean ikusi duen pelikula, Bernar arraindunari kontatzen.
_ Mutikoa
andaluza da, eta hemengo neskato bategaz maitemintzen da eta hona dator neska
bila eta konturatzen danerako gizajoa kalabozuan sarten dabe, gura barik
kontenedore bat erreten dauelako, eta kalabozuan beste burrukalari horreetakoak
dagoz eta berak euskalduna izeteko plantak egiten dauz...
_ Andaluza, euskalduna da
ala?- galdetzen dio Bernar-ek , matxetea eskuan...
_ Ez, ez, andaluza eta
erdelduna, baina bildur danez, gainerako presoak oso gaizto arpegiak dabezelako
hasten da euskaldun modura berba egiten...
_ Eta besteek
sinisten al diote?
_ Bai... zer komandokoa dan
galdetzen diote eta berak “Soy del Comando G” -eta besteak- Komando G? ... -eta
andaluzak- bai, “Comando Gipuzkoa”, kar
kar kar...
_ Polite da gero pelikulea?
_ Bueno, polite, polite...
parregarria da ba, badakizu... denbora-pasa horietakoa... “Vaya Semanita”
antzerakue...ongi pasa neban... sin mas.
Etorria da beste
auzokide bat dendara. Berrogei eta hamar urte inguru, aizkolari-atorra
jantzita, besoak gurutzatuta...
_ Ocho Apellidos Vascos? Bai
ergelkeria ederra... nolatan ez da aita konturatuko mutikoa ez dela euskalduna?
Zer uste dute? Euskaldunak atzo jaioak garela edo?
_ Kontuan hartu behar da komedia dala, besterik
ez... eta Karra Elejalde hori oso ondo dago... denok ezagutzen ditugu horrelako
tipoak... ez?
Andreak eta gizonak, argi dago, elkar ezagutzen dute.
Arrain-saltzailea arretaz entzuten ari da, adi, esku artean daukan legatza
gogoz zatikatzen duen bitartean...
_ Egia esan nik ez dakit zer
egin. Emaztea irrikitan dago ikusteko, baina kristoren ilarak omen dagoz... ez
dakit... Elisa ¿has visto tú Ocho
Apellidos Vascos?
Dendan gauden guztion buruak atzera bueltatzen dira.
Latino itxura duen neska potolotxo bat dago umetxoa alboan duela...
_ Ay sí, que linda...me
encantó... es que... los vascos están muy bien retratados... bueno a mí me
pareció...
Horrenbeste begi haren aurpegian iltzaturik, neskak
lotsatuaren irribarrea erakusten du, ia barkamena eskatuz.
_ Pues qué queréis que os diga
-gizonak berriz- a mí me pareció
otra españolada más... sólo faltaba Alfredo Landa...
Arratsaldean nire hamahiru urteko alabarekin joan nintzen
zinemara eta egia esan, dendan
entzundako iritzi guztiek beren arrazoi-partea zutela iruditu zitzaidan. Egia
da gatz lodiko umorea daukala gehienbat. Egia da lotsatzeko uneak ez zaizkiola
falta, batez ere euskara dela-eta txisteak egin nahi dituenean (barre gutxien
orduan lortzen du, bide batez esanda). Endredozko komedia bezala nekez
funtzionatzen du, baina bestalde, akatsak akats, Karra Elejaldek eta Aitor
Mazok antzezten dituzten paperak guztiz ezagunak egiten zaizkigu; Carmen
Machi-k, ohikoa denez barre-algararik ozenenak eragiten ditu, eta, gidoiak
izorratzen ez dituenean, protagonista gazteek ez dute gaizki egiten. Honen
guztiaren gainetik, nire alaba (euskalduna eta ikastolan hezia) horren pozik
ikusteak, bertoko topikoekin barrezka, zerbaitetan asmatu egin dutela
pentsarazi zidan. Azken finean urte mordoa da -denbora gehiegi agian-
euskalduntasuna dramarekin eta ezkortasunarekin lotzen dugula.
Trucha policía. Poca diversión.
Ikuspuntu guztiek bere arrazoi apurtxoak dituzte. Bizkaitar gatzadun euskalkiarekin, horrez gainera, arrazoi gehiagorekin ;D
ErantzunEzabatuBarregiteko bestela ez den pelikula batez solasten ari gara. Komeria. Ezin ulertu dudana da zergatik pentsatzen dute Espainaldean txartzat hartu dutela euskaldunek filma. Eta nondik atera dute biktimei trufa egiten dietela?
Gauna onenetarikoa: Beste lekuetan euskaldunak erakargarriak omen garela, ezezagunak, misteriotsuak. Pelikula ikusteko ilarak hor daude baiezteko. Azken finean peli hori esker, ezagutuko gaituzte (erdi gaizki edo erdi ongi) baina beldurra kenduko zaie gutaz.
Drama ugari bizitzen gara, parre egiteko pelikula ez da txarra, eta, azkenean zer esaten du filmak? Ba hori, ez garela hain ezberdinak gu artean.
Kaixo Juli, zu bai gatzaduna gero!
ErantzunEzabatuLa Vanguardian argitaratu zen artikulu batetan, kazetaria amorratua zegoen Espainian euskaldunak katalanak baino ospe obeago dutelako. Gauza biak topikoeta oinarrituta dago gehien bat, baina bitxia bada ere horrelako zerbait bai gertazten dela.