Munduan Springfield-en tankerako leku bat baldin bazen, hori Pripiat zen. The
Simpsoms familiaren herria legez, Pripiat ez zen hiri handia, ez herrixka.
Populazioa oso gaztea zen (30 urtekoa batez beste) eta langabezia arrastorik ez
zen inondik sumatzen. Gizakiaren neurrira eraikitako hiria: etorbide zabalak, jolas-parkeak nonahi, hamar
kirol-areto, hiru igerileku, bi estadio, ongi hornitutako ospitalea, eskola eta
biblioteka bana auzoetan.
Sobietar Batasuneko harribitxi bat zen Pripiat. Ipuinetako bazter honetan soldatarik gorenak
zituen eta bere fundazio egunetik, 1970ean izan baitzen, den-denek zekiten zentral
nuklearrari esker zela posible hori guztia. Izan ere, Txernobyleko
langileentzat diseinatu zen hiria hasiera batean.
1986ko apirilaren 26n Ivan Chémizovek 26 urte zituen. Estatuak babestutako
pisu batean bizi zen, emazte eta alabarekin.
Baxua jotzen zuen jazz talde batean eta buru belarri entsegutan
ziharduen taldekideekin, maiatzaren leheneko ospakizunetarako prestatzen. Aparteko
data horretarako jolas parke berri bat inauguratuko zuten, noria erraldoi eta
guzti. Ivanek honela gogoratzen ditu bere bizitza betiko aldatu zuten orduak:
“Ohean nengoen irakurtzen, goizaldeko ordu bata inguruan, trumoi antzeko
burrunba entzun nuenean. Orduan ez nuen ezer susmatu. Ekaitza izango zelakoan loak
hartu ninduen. Larunbatean jakingo genuen laugarren erreaktorea lehertu
zela.
Hurrengo egunean nire bost urteko alabarekin paseoan atera nintzen. Langile
batzuk kale garbiketan ikusi genituen baina inork ez zigun esan erradiazioaren
eraginpean geundela. Igandean, goizeko hamarretan, ebakuatu egingo gintuztela
iragarri ziguten. Egun hartan, arratsaldeko hiruretan 1.500 autobus etorri
ziren Pripiateko 50.000 biztanleak kanporatzearren. Hiru eguneko gauza izango
zela esan ziguten. Gero inguruko herrixkatan banatu gintuzten, baina horietako
askotan baserritarrek mehatxuka jaso gintuzten, ez zuten nahi kutsatuekin
nahastu”.
Ivanen testigantza da, Pripiaten bertan eman baitzuen duela gutxi, zenbait
kazetarirekin eta auzokide izandakoekin hirira itzuli zenean. Bere
“Springfieldeko” bizimodu eroso eta lasaitik zuzenean infernura: hilabete asko
pasatu ziren beste pisu bat Kieven emango zieten arte. Zonalde kutsatuan
jarraitu behar zuten elizatan kontzertuak emanez Txernobyleko
“likidatzaileentzat”, ez zeukatelako
beste ogibiderik eta zortzi urterekin alaba minbiziz hil zen.
Orain Pripiat berriro modan dago. “Chernobyl diaries” beldurrezko pelikulak
nerabez betetzen ditu zine aretoak eta erradiaktibitatea beste edozein lekutan
baino 12 aldiz handiagoa bada ere, Ukrainako gobernuak kontrolatutako bisita
turistikoak baimendu ditu. Hiroshiman botatako bonben erradiazioaren halako 500 jaso zuen hiriak. 24 milurteko pasa beharko
dira guztiz desagertu arte.
Natura jaun eta jabe egiten da egunez egun, paradisu izandakoan. Gizakiak
onena eta txarrena asmatzeko lekukotasun isila.
Betiko geldirik geratu zen noria Garoñan. Barkatu, Pripiaten esan nahi
dut.
iruzkinik ez:
Argitaratu iruzkina