Luzaroan ibili dira Ruben Blades eta Willie Colon, Goenkaleko
Lasa anaiak bezala, “elkarri mokoka”. 70eko hamarkadan Siembra eta Canciones
en el Solar de los aburridos elepe historikoak konposatu eta grabatu
zituztenak gerra zikin bezain lotsagarrian aritu dira, lehen epaitegietan eta
orain zenbait gizarte-saretan.
Silvio Rodriguezen semea, "Silvito el Libre" |
Eztabaidaren sorrera diru-kontua omen da, 2002ko urtean
elkarrekin egin zuten biraren ondorengo desadostasunak direla eta. Baina harrez
geroztik beste esparru batzuetara eraman dituzten amaigabeko ika-mikak. Puerto
Ricoko tronbonistak argazki bat eskegi zuen bere Twitter-kontuan zeinean
Bladesek eta Hugo Chavezek eskua ematen zioten elkarri, jendaurreko ekitaldi
batean. Iruzkin bakarra: “Sin palabras”.
Baina askoren harridurarako, duela gutxi Rubenek Nicolas
Maduroren politikaren aurkako kritika bortitza argitaratu zuen bere web
orrialdean. Bere iritziz Madurok duen gehiengoak ez dio behar besteko
zilegitasuna eskaintzen “nahi duen eredu ekonomikoa inposatzeko”. “Ez dut eredu
hori epaitzen, baina argi dago zure herriaren baitan daukazun laguntza ez dela
nahikoa hura martxan jartzeko” idatzi zuen. “Benetako iraultza -jarraitzen zuen
Rubenek- jendearen bizimodua hobetzen duena da”. Bladesen hitzek oso mindu
zuten Venezuelako presidentea. Erantzun agiri luze batean Madurok bere
herrialdea bisitatzera gonbidatzen zuen “benetako Venezuela ezagutzearren”,
bere aberrian bizitzen den egoera “ez delako inperialistek erakutsi nahi
dutena”.
Izan ere Ruben Blades ez da Venezuelako egoerarekin
kezkati agertu den artista bakarra. Juanes,
Paulina Rubio, Alejandro Sanz, Ricardo Montaner, Cher eta Madonna
abeslariek, besteak beste, hitz gordinak erabili dituzte presidentea
protestak zapaltzeko erakusten ari den
jarreraren kontra. Baina Rubenen jarrera da erantzun zuzenik merezi duen
bakarra Maduroren aldetik.
Hautsak nahiko harrotuak izan ez eta, Kubatik ere SilvioRodriguez azaldu da Bladesen jarrera gogor gaitzetsiz: “¡Qué fallo!”
izenburupeko eskutitz luze batean Nueva Trova Cubana-ko sortzaile izan zena samintasunez
zuzentzen zaio: “Ezinezkoa da iraultza
bat bi taldeentzat zorionekoa izatea. Iraultzak justizia ekarriko du eta
justizia egitea ez da urtebetetze jaia” . “Denetarako azalpenik daukat -esaten
du jarraian- baina tristatzen nau zeharo pentsatzeak inoiz ez dudala Amerikako
kantorea izan nahi zuenaren musika era berean entzungo”.
Baina Silvioren aberriaren egoera ere zenbait musikariren
dianan dago azken bolada honetan. Bitxiena kasu honetan, irla barnetik sortuak
direla ahotsak. Los Aldeanos izeneko raperoak eta haiekin batera Rodriguezen
izen bereko semea “Silvito el libre” izenez agertzen dena. Kontinente osoan
izugarrizko oihartzuna lortzen ari dira Kubako gobernuaren kontrako hitz
zorrotzak erabiliz. “Háblame” abestian
adibidez honelako harribitxiak aurki daitezke: “Hitz egin iezadazu /zure
trikimailuez, zure lerdokeriez/ zure interesekin nahastutako komunismoaz/ zure
horrenbeste ergelkeria entzutearren hazten ari den gorrotoaz/ eta miseriaz/
herriak ez du merezi eta...”
Pentsa daitekeenaren kontra, “Silvitok” argi eta garbi
azaltzen da bere aitaren alde eta hartaz galdetzen diotenean beti “harro
dagoela” erantzuten du. Horrexegatik Miamiko kubatarren komunitatea erabat
banaturik agertzen da fenomeno berri honen aurrean.
Pablo Milanesek abesten zuena: “Vuelve a sacudirse el
continente”.
iruzkinik ez:
Argitaratu iruzkina