"La Misma Ciudad" liburuaren azala |
Ihes
egin, hanka egin, alde egin, itzuri, ospa egin. Zeini ez zaio burutik pasa
noizbait urrutiratzeko ideia? Lobatonek
erakutsi zigunez, uste genuen baino jende gehiago desagertzen da. Egun batetik
bestera, berak bakarrik dakien arrazoiren batengatik, gizaki batek ospa egitea
erabakitzen du. Eguneroko prentsan aztarna handia ez badago ere, 14.000
pertsona desagertzen dira urtero Espainian. Horietatik % 90 agertzen dira,
baina gainerako 1.400ak ez dira sekula gehiago itzultzen. Telesaio mitiko
horretan agerian geratzen zenez, horietako iheslari asko bizitza berri baten
bila dabiltza. Etxean geratzen direnentzat, horrelako desagertzeak arras
mingarriak izaten dira. Baina hanka egin dutenentzat ere ez da erraza izaten. Atzetik
uzten duzuna, nola edo hala, aldean eraman beharko duzulako, mamu baten antzera.
Baina
zenbait kasu bitxitan, alde egiten duenak inguru-kideei hilik dagoela sinestarazi
die.
Horrela,
bere oroitzapena ez da horren mingotsa izaten, hildakoei izaten zaien
errespetuarena baizik.
Txilen,
Augusto Pinochetek estatu kolpea eman zuen egunetan, Pablo Gajardok, metaleko langile
batek, egoera baliatzea erabaki zuen. Zorrez josita zegoen eta bere familiak ez
zekien ezer. Antofagastan, bere hirian, ehunka desagertze zeudelarik, hankaz gora
utzi zuen bere logela, guztiek atxiloketatzat har zezaten. Egun luzeetan zehar
Peruraino ibili zen eta Liman jarri zen bizi izaten, nortasun berri batekin.
Urte mordoan Pablo zapalketaren martiria zelakoan zeuden familian eta lagunen
artean, bere benetako heriotzaren ordua heldu zen arte. Orduan, bere Limako
lagun batek, ezustean, oroigarriz betetako kutxa bat aurkitu zuen bere etxean.
Hor barruan zeuden, besteak beste, bidali gabeko eskutitzak eta bere emaztearen
argazki bat. Dena agerian geratu zenerako bere andrea hilik zegoen eta bere
semeak, ez baitzuen aita ezagutzen, gorpua ez aberriratzea erabaki zuen.
2001eko
irailaren 11n Brandon Moy izeneko gizon iparramerikarrak oso antzeko pasadizo bat
bizi izan zuen. World Trade Centerren kokatutako bulegora berandu zihoala, hondamendia gertatu zen. Infernu
hartan zaurituen laguntza lanetan egonik, telefonoentzako estaldurarik ez
zegoela jabetu zen. Bat batean, senide
eta adiskideak ordurako hildakotzat hartuko zutela konturatu zen. Brandonek ez
zeukan diru arazorik eta oso bizimodu lasaia eta erosoa zeraman bere emazte eta
semearekin. Baina aspaldiko partez, ihes egiteko fantasiarekin bizi zen.
Gaztaroko ametsak traizionatu zituelakoan zegoen eta asperdura zen jaun eta
jabe bere egunetan.
Nahasmena
aprobetxatuz ezarian alde egin zuen eta San Frantziskora abiatu zen bizitza
berri baten bila.
Lehenengo
gertakaria guztiz egiazkoa omen da. Bigarren hau, Luisgé Martin idazlearen “La Misma Ciudad” izeneko
eleberriaren argumentua. Horrexegatik ez dizut amaiera estalgabetuko.
Baina bai liburua gomendatuko.
iruzkinik ez:
Argitaratu iruzkina