Breakin Bad |
Gaizto bihurtzea. Zeinek ez du bere burua eginkizun horretan
irudikatu? Zeinek ez du pentsatu bere barruan bizi den gaizkilea ateratzea
izorratzen zaituen norbaiti bereak eta bi ematearren? Antzerkia, literatura,
zinea, egun batetik bestera gaizto bilakatu diren pertsonaiez beteta daude. Eta
ezin erakargarriagoak izaten dira hauek.
Alejandro Dumasen Montekristoko kondea bertutezko
gizona zen, baina azpijokoak zirela medio, etsaiek betiko sartu zuten urrutiko
irla bateko espetxe-gazteluan. Patuak mendekuaren plater hotzak dastatzeko atea
zabaldu zion eta milaka irakurlek, urteetan zehar, berak asmatu zituen gaiztakeriekin
gozatu izan dugu, haurtxoak titian bezala.
Txikitako heroien artean ere, ugari dira halakoak: El
Fantasma, Tulipan Negro, El Zorro, Batman... guztiak
bihotz oneko gizakiak, egunen batean euren kontu hartuko zutenak justizia,
gaizkiaren biktimak izan ondoren.
Gure irakasleek guztiz kontrako istorioak kontatzea
nahiago zuten: gaizkileak eta emagalduak santu eta done bilakatzen zirela...
aharrausi egiteko modukoa.
Nire belaunaldiko mutikoek, Kung-Fu telesaioa
maite genuen oso. David Carradin protagonista zuen abenturetan, indarkeriarik ezaren
mezua saltzen omen zen. “Matxinsalto txikia” ekialdean irakatsitako arte
martzialetan aditua zen, baina inoiz ez zituen alferrik erabiltzen. Hortaz, atal osoan zehar gorriak eta bi jasaten
zituen inolako erantzunik eman gabe... baina azkenean, denok irrikitan
geundenean, bortizkeria erabili zezan desiratzeraino, ostiko eta zartaden jai
alaia lehertzen zen biba eta txalo artean.
Gerrillari eta bidelapurren hainbat biografiatan ere
horrelako ibilaldiak errepikatzen dira. Izan
ere Jesukristok berak bortizki bota behar izan zituen fariseuak tenplutik, bere
bizitzaren argumentua guztiz borobila eta sinisgarria ager zedin.
Egun hauetan ahoz aho dabil Breaking Bad telesaio
aparta. Bertan, Walter White izeneko irakasleak gogor egiten du lan bere
familia aurrera ateratzeko. Seme minusbaliatu baten aita da eta haren emaztea
haurdun dago. Egun batean biriketako minbizia daukala jakinarazten diote. Nola
edo hala diru mordoa lortzeko premia du. Bere antzinako ikasle baten eskutik
datorkio aukera. Familiaburuak bere kimika-adimena erabiliko du lehen mailako
meta-anfetamina lantzeko. Konturatzen denerako bere burua krimen munduan leporaino
sartuta ikusiko du. Denbora pasa ahala bere lehenengo helburuak (tratamendua
ordaintzea, familia babestea) aitzakia besterik ez dira izango.
Ongiaren alde gaizkia egitea: erabateko kontraesana.
Zuzenbide Estatua bera kriminala bilakatzen da krimenaren kontra bere legeak
bortxatzen dituenean.
Ongia eta gaizkiaren arteko muga, mehea bezain lausoa.
Nire haurtzaroan nonahi entzuten zen “Viva la Gente” abestian, honako hau kantatzen zen:
“Dentro de cada uno/ hay un bien y hay un mal/ Mas no dejes que ninguno/ Ataque
a la humanidad”... Ongia ere gizakia erasotzeko gai al zen? Ez nuen ezer
ulertzen. Orain aldiz, uste dut badakidala zer esan nahi zuen eliza-kutsuko
kanta horrek (nahi gabe agian): Ongiaren alde gaizkia egitea ez da benetan
ongiaren alde egitea... Ongia eta gaizkiaren arteko marra gorria ekintzetan
datza. Ez iezadazu esan zer pentsatzen duzun, zer egiten duzun baizik.
Ez dut inoiz ikusi "breaking bad" bainan zurea irakutzen konturatu naiz batzuetan premiak behartzen zaituela. Eta, horrez gainera, "viva la gente" abestian mezu izkutua zegoela: zure ontasuna erasotzailea izan daitekela. Uh, latza.
ErantzunEzabatuBa erabat gomendatzen dizut. Ez da batere zaila on-line ikustea eta ingelesa praktikatu nahi baduzu azpitituluekin ikusi dezakezu. Hori bai, batzutan tripek sufritzen dute...
ErantzunEzabatu