Murrizketako gabon hauetan ezusteko
galantak bizitzeko aukera izaten ari gara. Freixeneteko burbuilak EREn daude,
El Corte Ingleseko ohizko izarra erdi-ezezaguna dugu aurten eta Xabi Alonsori
ez omen zaio heltzen benetako angulak erosteko…batzuei Olentzerok soldata murriztu
digu, baina hori bai. Beste gobernu bat ekarri digu trukean.
2012ko Eusko Jaurlaritza |
Eusko Jaurlaritzako Sailburu berrien profilak
irakurtzean, denak nire belaunaldiaren bueltan daudela ohartu naiz. My
Generation boterean dago. Zeinek esango zukeen. Bataz besteko sailburuen
jaiotza-urtea 1960 da (horietako lau, urte horretan bertan jaioak dira hain
zuzen). Horrek, halabeharrez, baterako bizipenak edukiko ditugula esan nahi du.
Sailburu-tipo hau ETAren
garaikidea izan da bere jaiotzatik. Hamar urterekin Burgosko auziaren berri
izango zuen eta hamahiru urterekin, aho bete hortz, “telediarion” Carrero
Blanco almiranteren kontrako ekintzaren irudiak ikusiko zituen. 1975. urtean
frankismoaren azken fusilamentuak –eta kalean izandako erantzunak- argi eta
garbi gogoratuko ditu, baita hurrengo urteetan Lemoizen aurkako mobilizazioak
eta hilketak ere.
Belaunaldi-kideak hemeretzi urterekin
autonomia estatutua bozkatzeko aukera izan zuen, ikurrina legalizatua izan
zenetik soilik bi urte pasa ondoren.
Gogoan izango ditu ere berunezko
urteak eta Miguel Angel Blancoren bahiketa eta hiltzea, ahaztea nahiago
lituzkeen arren.
Baina zorionez, gurea ez da
bakarrik “gatazkaren aroa” izan. Argazkian daudenek, ziur aski, amets egin
zuten unibertsoko konkistarekin , Armstrong izeneko gizonezko batek lehenengoz
ilargia zapaltzen zuen bitartean. “Somos malos malasombra” abestu zuten
txikitan gaizto aurpegia jarriz eta igandeko saioetan Cantinflas, Tarzan,
bakeroak eta Biblian oinarritutako pelikula mordoa irentsi beharko zituzten,
besteak beste. Eurobisioan, Massielen
ezusteko garaipenaren lekuko izan ziren. Gaztaroan Errealak eta Athleticek
ligak nola irabazten zituzten gozatzeko aukera izan zuten, munduko normalena
izango bailitzan. 1980eko hamarkada horretan ere fabriken itxiera, HIESAren
izurritea eta heroinak eragindako sarraskia ezagutu zuten, punk mugimendua eta
“disco-music”a norgehiagoka ari ziren aroan.
Euskara “putzu sakon eta ilun
batetik” zelan irteten zen bizitzeko parada ere izan dute eta Urko, Lertxundi,
Laboa eta beste hainbesterekin batera ospatuko zuten kantaldi jendetsuetan.
Haien soinu-bandan, ezinbestean,
hor egon dira baita ere Rolling eta Beatles, Raphael eta Mocedades, Itoiz eta
La Polla Records…
Ia konturatu barik esku-telefonoa
eta Internet guztion bizimoduan betiko sartu ziren eta horren futurista egiten
zitzaien 2000. urtea iraganean geratu zaie.
1965. urtean The Who taldeak “My
Generation” plazaratu zuen. Gaztaroan bakarrik erakusten den harrotasun
horrekin horrela ari ziren: “Jendea gu baztertzeko ahaleginean dabil/Soilik hor
gaudelako/ Egiten dutena ikaragarri da hotza/ Zahartu baino lehen zendu nahi
nuke...”. Bai kantaria eta bai konpositorea bizirik daude, hirurogeita hamar
urtetsurekin. Berriro ere: “Bi urte mintzatzen ikasteko, bizitza osoa isiltzen
jakiteko”.
Zorte on guztioi. Bihotzez.
iruzkinik ez:
Argitaratu iruzkina